Lo Mai
Informations diverses
 |
Aquí avèm lo mes de mai
Quand los galants plantan lo mai,
Lo plantarai per Catarina,
Serà pus nalt que sa teulina.
Per que lo mai siaga gardat
Farai soldat a son costat,
I me tendrai per sentinèla
Atal serai prèp de ma bèla !
Mas quand vendrà lo temps d'estiu
Caldrà partir, luènh per en briu,
Serà lo temps de l'estivada,
Per ieu lo sòrt serà l'armada!
Atal serà que lo miu mai
En partiguent lo daissarai,
Serà lo jorn que se desplanta:
A la Sant Joan: Adíus galanta!
Car per l'armada partirai
E mon aimada quitarai,
Me n'anarai devàs Marsèlha
E dins sèt ans serà la vèlha!
Quand de l'armada tornarai
Davant sa pòrta revendrai,
Demandarai a la vesina:
- Cossí se pòrta Catarina?
- Catarina passa bon temps
Es maridada n'i a de temps
Amb un garçon de la montanha
E que presa per comanha!
Li fa portar capèl montat,
La mòstra en aur, a son costat,
Oc fariás pas, tu rabalaire!
De la far viure sens res faire?
- Ieu sabe ben de que farai
Me n'anarai, m'engatjarai,
Per m'entornar drech a Marsèlha
E pensarai pus a la bèla!
Sources
Cançonièr de la ribièra d'olt de Zefir Bòsc - 1995 - Page 42.
